Trafikken er i ferd med å ta seg opp

– Det er mange bilar, særleg vestover og nordover, seier trafikkoperatør Hans Are Dahl i Vegtrafikksentralen øst til TV 2 litt etter klokka 16.

Onsdag er venta å bli den største utfartsdagen i mai. Årsaka er Kristi himmelfartsdag torsdag, og ein inneklemt fredag, som gjer at mange kan ta langhelg.

Så langt er det i hovudsak normal rushtrafikk, ifølge Dahl.

– Om det er meir bilar enn det ville vore på same tid ein annan onsdag er vanskeleg å seie, seier han.

– Dei som må ut og reise må vente at trafikken går sakte, og den vil gjere det litt lenger enn den normalt ville gjort, legg han til.

Mest vestover og nordover

I området rundt hovudstaden er det venta mest trafikk vestover og nordover frå Oslo, på høvesvis E18 og E6.

– Sørover er det faktisk greitt ut av Oslo. Det løyser seg opp når ein passerer Klemetsrud. Vidare forbi Moss er det veldig fint og ikkje så tett, seier Dahl.

Det har vore nokre mindre uhell på hovudvegane så langt.

• På E6 ved Rygge i Østfold var det eit trafikkuhell i sørgåande retning like etter klokka 15. Fire bilar var involvert. Ingen personar blei skadd. Trafikken blei ei stund leda forbi staden, men vegen opna igjen for normal ferdsel klokka 15.30.
• I Bergen var det ei kort stenging av Fløyfjellstunnelen på E39 i nordgåande retning like etter klokka 15.30. Ifølge BA verka det som ein motorsykkel hadde fått stans, men den skal ha starta igjen og kome seg vidare.
  
• På E6 ved Vingrom kirke sør for Lillehammer mista ein personbil eit hjul og måtte bergast. Trafikken blei dirigert i sørgåande retning. Uhellet blei meldt om rundt klokka 16.15, og vegen opna igjen rundt klokka 16.50.
• På E6 sør for Arteid bru i Lillestrøm kommune kolliderte fire bilar i nordgåande retning. Ingen blei skadd. Politiet melde om ulykka klokka 19.50. Vegen opna igjen litt etter 20.30.

I Bergensområdet er det mest trafikk mot Sotra, Askøy og Åsane, ifølge trafikkoperatør Christian Strømmen i Vegtrafikksentralen vest.

– Det er bra med trafikk i sentrumsområdet. Men når ein kjem litt utanfor så ser vi ikkje så mange teikn til utfart enno, seier Strømmen til TV 2 klokka 16.40.

Det same gjeld på ferjesambanda Halhjem-Sandvikvåg og Lavik-Oppedal på E39, der det er venta at det kan bli mykje trafikk.

– Ta det med ro

Oppfordringa frå Vegvesenet er som den pleiar å vere på store utfartsdagar: Ta det med ro.

– Vi oppfordrar folk som skal ut og køyre om å ta det med ro og ikkje stresse, seier Dahl.

Onsdag er også den første store utfartsdagen etter at kollektivfeltet i Oslo-området blei stengt for elbilar. Derfor synest trafikkoperatøren det er vanskeleg å spå når trafikktoppen kjem.

– Så lenge det ikkje er nokre hendingar i trafikken, og alle følgjer med og ikkje byter felt i hytt og pine, så satsar vi på at alle kjem dit dei skal til om lag forventa tid, seier Dahl.